OPASCOR kampiyon sa CAV basketball tournament

CEBU, Philippines - Nakalingkawas ang Oriental Port and Allied Services Corp. (OPASCOR) sa kulbahinam nga duwa pinaagi sa pagpilde sa That's Right, 87-85 aron langkaton ang kampiyonato sa Christian Athletic Volunteers (CAV) Invitational Basketball Tournament sa miaging gabii didto sa Tejero Sports Complex.

Sa sayo pa, si Benjie Orquez mibomba og 19 puntos alang sa AC Sports nga mipatapsing sa A and S Pace, 80-79 aron sakmiton ang third place trophy.

Nagkamang ang iskor atol sa first half, apan kalit mibukal sa kainit ang opensa sa OPASCOR aron moabante og siyete puntos, 71-64 sa nahabiling 2:31 sa third period.

Nahimong kulbahinam ang duwa dihang nakasikit ang That's Right, apan mipatigbabaw ang kusog sa OPASCOR.

Si Jaymar Canoy maoy nangulo sa OPASCOR pinaagi sa iyang 17 puntos, lakip na ang duha ka free throws sa nahabiling 1.2 segundo nga maoy mikandado sa kadaugan. Si Nognog Saga miamot og 15, samtang si Ramiro Cadungog mihakot og nuybe puntos alang sa OPASCOR.

Nangulo sa pilderong That’s Right mao sila si Joemarie Belderio sa iyang 17 puntos, gisundan ni Ramilo Pero nga adunay 13 puntos.

PUNTOS MATAG USA

Unang duwa

AC Sports (80) - Orquiz 20, Tigbas 16, Flordeliz 9, Demecillo 4, Rosas, Surmion 2, Florita 2, Yap 2

A and S Pace (79) - Beroin 31, Pocdol 22, Gallado 14, Casicas 13, Limpio 2

Ikaduhang duwa:

Opascor (87) - Canoy 17, Saga 15, Cadungog 9, Villaro Jr. 8, Amorin 8, Esperat 8, Lopez 6, Astillero 2, Solis 2

That’s Right (85) - Belderio 17, Pero 13, Fajardo 11, Bughao 11, Campana 7, Baraga 6, Plant 5, Jagdon 4, Molina 4, Mansueto 4 (BANAT SPORTS)