Servania, Pagara misalbar sa Pinoy Pride XII sa bohol

CEBU, Philippines - Napuno sa kadismaya ang mga Boholano boxing fans sa main event fight sa ‘Pinoy Pride XII:Bakbakan sa Bohol’ tali ni Rey ‘Boom Boom’ Bautista ug Mexican Genaro Garcia, apan natagbaw sila sa aksyon sa undercards didto sa Carlos P. Garcia Sports Complex.

Ang rising super bantamweight prospect nga si Genesis ‘Azukal’ Servania maisugong nakigbinukbukay sa lig-ong Kenyan boxer nga si Nick Otieno kinsa iyang gilupig pinaagi sa unanimous decision.

Nabutang sa peligro sa third round si Servania human siya maigo sa makabungog nga one-two combination sa Kenyan boxer apan nakahimo siya pagtiwas sa round.

Gikan didto mihimo og gamay'ng adjustment ang 20-anyos nga Bacolod City boxer aron maalkontra ang atake ni Otieno. Misugod pagdomina sa away si Servania sa seventh round diin diriyot niya mapatumba si Otieno ug gikan didto wala na niya lung-i pagkulata ang Africano.

Human sa 10 ka rounds nga binukbukay, tulo ka mga hurado ang mihatag og 99-91, 99-91 ug 98-92, tanan pabor ni Servania.

Sa laing away, ang kanhi WBO Youth Asia-Pacific junior welterweight champion Jason ‘El Niño’ Pagara mipamatuod nga andam na siya nga ibangun iyang karera dihang iyang gipukan ang Indonesian nga si Frans ‘Hands of Stone’ Yarangga sa 2:41 sa second round.

Mahinungdanon ang daog alang ni Pagara kinsa napilde sa katapusang sangka niya batok sa Mehikano nga si Rosbel Montoya sa miaging tuig didto sa Waterfront Hotel.

Mikaway usab og atensyon ang kadaugan ni Michael ‘Bruce Lee’ Domingo dihang gi-KO niya sa round 1 si Marvin "Leyte Bomber" Tampus sa 1:28 sa first round.   - BANAT NEWS