AJ Banal mobida sa PP XIII

CEBU, Philippines - Gikatakdang modepensa sa iyang bakus si WBO Asia-Pacific bantamweight champion AJ 'Bazooka' Banal batok sa Mexican challenger Raul 'El Bule' Hidalgo sa main event sa "Pinoy Pride XIII: Road to Glory" sa Marso 24 didto sa Waterfront Cebu City Hotel and Casino.

Ang away ni Banal (26-1, 17KOs) batok ni Hidalgo (15-5, 11KOs) magsilbeng preparasyon alang sa umaabot niyang world title fight sa Hunyo o di ba Hulyo ning tuiga.

"Banal will definitely fight for a world title this year probably in June or July," matud pa ni ALA Promotions president Michael Aldeguer atol sa press conference kagahapon didto sa Cityscape Hotel sa Panagdait sa Mabolo, ning siyudad.

Si Banal, ang rank No. 1 sa World Boxing Organization (WBO), apan miduol na ang kahigayonan niya nga moaway sa world title human ang reigning bantamweight champion nga si Jorge Arce naglaraw mosaka og timbang aron hagiton si Nonito Donaire.

Ang garbo sa Brgy. Ermita mipadayag nga andam na siya alang sa usa ka world title fight ug andam na usab siya nga pildihon niya si bisan kinsang boksidor nga mobabag sa iyang dalan.

Gawas ni Banal, laing mga ALA Boxing Gym fighters nga makigsangka batok sa tagsa-tagsa nila ka mga langyaw'ng kaatbang mao sila si Rocky Fuentes (32-6, 19KOs), Arthur Villanueva (17-0, 12KOs) ug Albert Pagara (10-0, 8KOs).  (BANAT SPORTS)