Binukbukay sa gaisano countrymall

CEBU, Philippines - Dose ka paresan sa mga amateur boxing prospects ang magsangka sa laing edisyon sa Summit Natural Drinking Water Fight Night Amateur series karong gabii didto sa Gaisano Countrymall carpark.

Mga boksidor gikan sa Flores Boxing Club nga sila si Ariel Sibay, Romel Tuñacao, Rosfyrd Wagas ug managsuong Melmark ug Welmark Dignos ang moladlad sa ilang abilidad.

Si Sibay moharong ni Rami Casañares sa Pit-os, samtang si Tuñacao mosangka ni Rhezon Taroma sa Phil-Aust Boxing Club ug si Wagas makigsinukliay og kumo ni Jeorge Ledesma.

Ang managsuong Dignos makigbatok nila ni Bryan Remedio sa University of the Visayas (UV) ug Kevin Jake Catajara sa Talamban National High School.

Ang teammate ni Taroma nga si BB Rama mosukod sa abilidad ni Vicente Seos-e Jr. sa Cabancalan, samtang si Bryan Paden sa Opao, Mandaue makigpinaksitay ni Polid Banal ug si Christian Bacolod sa Mabolo makigsangka ni Rolan Servania sa Bacolod City.

Mga boksidor nga maoy mokompleto sa maong away mao sila si Cherwellan Cantel batok Ritchie Montealto, Tiboy Ardiente batok Rolan Perez, Dann Lou Codilla batok Mardie Muaña ug Robert Labanza batok Robert Eturma. (BANAT NEWS)