Pagulayan naka-isa na

MANILA, Philippines - Kinuha ni Alex “The Lion” Pagulayan ang unang titulo sa taong ito nang talunin si Oscar Dominguez, 11-9, sa finals ng 16th Annual Jay Swanson Memorial 9-Ball Tournament na ginawa sa Hard Times Billiards sa Belflower, California, USA.

Ito ang ikalawang sunod na taon na dinomina ni Pagulayan ang nasabing kom­petisyon na nilaro noong Pebrero 4 at 5 at nangyari ito kahit nilahukan ang palaro ng mga bigating pool players tulad ng mga dating kampeon na sina Morro Paez (1999 at 2001), Dave Hemmah (1996), Mitch Ellerman (2009), A mar Kang (2006).

Kinailangan din ni Pagulayan na bu­mangon mula sa loser’s side nang natalo kay Eberle sa seventh round upang ma­ging matamis ang panalo.

Umabot sa 192 ang manlalarong nag­laban at sila ay sumalang sa 16 rounds at si Pagulayan ay nakapasok sa finals nang balikan si Eberle, 7-2, at mapangunahan ang loser’s bracket.

Si Dominguez ang kampeon sa winner’ side pero malamig ang kanyang na­ging panimula dahilan upang lumayo sa 10-3 si Pagulayan sa race to 11 finals.

Ngunit nakabawi ang Mexican-Ameri­can player at naipanalo ang anim na su­nod na racks para dumikit sa 10-9.

Walang tira si Dominguez sa 1-ball upang mangailangan siya ng safety shot.

Pero may kung anong suwerte ang ku­mapit kay Pagulayan dahil ang kanyang pabandang tira sa cue ball ay hindi lamang tumama sa 1-ball kundi gumulong pa sa nagkumpulang bola na kinabilangan ng 9-ball.

Tamang-tama ang lakas ng banggaan ng cue-ball at ibang bola at ang 9-ball ay gumulong patungo sa side pocket upang hiranging kampeon uli si Pagulayan.

Halagang $3,000.00 ang premyong na­panalunan ni Pagulayan matapos kumu­bra ng $3,550.00 sa tatlong torneo na sinalihan sa Derby City noong nakaraang buwan.