Melindo Mi-Tkoni Esquer

CEBU, Philippines - Mipasulabi ang kahait sa abilidad ug kusug ni undefeated ALA Gym fighter Milan ‘El Metodico’ Melindo dihang miiskor siya og usa ka 7th round TKO nga kadaugan batok ni Mexican Juan ‘Panterita’ Esquer sa "Pinoy Pride XI: Philippines vs The World” sa miaging gabii didto sa Waterfront Cebu City-Hotel and Casino.

Nailhan isip usa sa mga labing maayong ring strategist sa Philippine boxing, si Melindo wala mihatag og kahigayunan ni Esquer nga makaporma.

Ang WBO Intercontinental flyweight champion nga si Melindo mipakita sa iyang ngilngig nga counter-punching ug nindot nga mga kombinasyon nga maoy iyang gigamit aron kastiguhon si Esquer.

Hinuon adunay nahitabong gamay'ng kasikas sa fifth round dihang usa ka low blow ang gipaigo ni Melindo ngadto ni Esquer kinsa daling miligid ibabaw sa ring, apan nadismaya ang mga fans dihang dugay kaayo mibarug ang Mehikano ug miarte nga grabeng nasakitan aron makakuha og kahigayunan nga makapahuway.

Subling milusad og bangis nga atake si Melindo human mibarug si Esquer aron ipadayon ang away, apan nahitabo na usab ang dili kasarangang istilo sa Mehikano sa round 7 dihang kalit kining miligid bisan pa og siya ang nakaigo og low blow ngadto ni Melindo.

Tungod niini napugos si referee Danrex Tapdasan nga undangon ang away sa 2:16 sa round seven ug ihatag ni Melindo ang daog.

“Klaro kaayo nga nasakitan siya sa akong mga tira mao nang iya tung gibuhat,” matud pa ni Melindo kinsa mapasalamaton gihapon tungod kay nagkaduol na kini sa damgo niya nga world title shot.

Sa iyang bahin, si ALA Promotions president Michael Aldeguer namahayag nga usa ka away ngadto sa Estados Unidos ang ihatag niya ni Melindo isip preparasyon sa posibleng title fight batok ni WBO flyweight champion Brian Viloria.

“Let’s see, probably we will take Milan to US to fight against a top 10 boxer in WBO that would serve as a chance to get the mandatory status,” matud pa ni Aldeguer. “We don’t want to fight another Filipino but if the chance appears then we will do it for the world title.”

Sa supporting bout, gipahagsa ni undefeated knockout artist Lorenzo ‘Thundervolt’ Villanueva ang laing Mehikano nga si Tyson Ledesma sa first round, samtang si Mhar Jhun Macahilig sayun ra usab nga mipukan sa Thai nga si Kaichon Sor Vorapin sa second round.

Midaog pinaagi sa unanimous decision si Merlito Sabillo batok ni Indonesian Sofyan Effendi, samtang mipatigbabaw usab si Joseph Von Minoza kontra sa South Korean nga si Yoo Shin Kim.  - BANAT NEWS