WBO mipasiugda'g basketball tournament

CEBU, Philippines - Isip kabahin sa ilang drug-free program alang sa mga kabatan-onan, ang World Boxing Organization (WBO) ug SGG Sports Promotions milusad sa labing unang WBO Kids Drug-Free Basketball Tournament nga gisugdan kagahapon didto sa Greenhills Subdivision Sports and Leisure Park sa Brgy. Casuntingan, Mandaue City.

Ang usa ka semana nga torneyo gisalmotan sa upat ka koponan nga bidahan sa mga magduduwa nga nagpangedaron og 19-anyos paubos.

Upat ka koponan nga miapil mao ang Greenhills Subdivision (Gold), Yocra (Black), Agro Macro (Red) ug Casuntingan (Blue).

Si WBO vice president Leon Panoncillo ug SGG Promotions president Sammy 'Don King' Gello-ani maoy personal nga mibukas sa kalihukan.

"We are very lucky that we are given the chance to support this program to keep kids away from drugs through sports," matud pa ni Panoncillo. "We are here to give support and we promise to do this every year and to reach out to the Filipino youth."

Ang champion team makadawat og mountainbike matag miyembro, samtang ang second ug third placers makaangkon og school supplies ug tropeyo. (BANAT SPORTS)