Sukmagay sa Waterfront

CEBU, Philippines - Barugan ni WBO Intercontinental flyweight champion Milan 'El Metodico' Melindo (25-0, 9KOs) ang saad niya pagtuman sa iyang damgo alang sa world title shot sa dihang modepensa siya sa iyang bakus batok ni Mexican challenger Juan "Panterita' Esquer (27-9-2, 21KOs)sa main event sa "Pinoy Pride XI: Philippines vs. The World" karong gabii didto sa Pacific Grand Ballroom sa Waterfront Cebu City Hotel and Casino.

"Andam na ko. Seguraduon gyud nako nga modaog kay importante kaayo ning awaya alang sa akong damgo nga world title fight," matud pa ni Melindo atol sa weigh-in kagahapon didto sa SM City-Cebu Event Centre.

Bisan pa sa una niyang bahad nga sayon niya tumbahon si Esquer, giklaro ni Melindo nga daku ang iyang respeto sa abilidad sa kanhi Mexican world title challenger.

Ang duha ka boksidor parehong mitimbang og 122 lbs. ug nakita sa tagsa-tagsa ka dagway sa duha nga nagpanikad na silang magbinukbukay atol sa tradisyonal nga "stare down."

Dihang gibuwag na ang duha, mihirit pa og sinyas si Esquer nga sama sa gigilitan niya ang iyang liog isip pasidaan nga iya gyud nga kastiguhon si Melindo. "I’m going to knock him out," mubong sulti ni Esquer.

Sa supporting bout, aduna gyu'y matumba sa sangka tali sa duha ka knockout artists nga sila si Lorenzo 'Thundervolt' Villanueva (21-0, 20KOs) ug Diego 'Tyson' Ledesma (18-4-2, 12KOs).

Masukod sab karon ang abilidad ni undefeated OPBF flyweight title-holder   Merlito Sabillo (16-0, 7KOs) sa iyang pakigsangka ni Sofyan Effendi (11-11, 9KOs), samtang si Mhar Jhun Macahilig (13-1,7KOs) makigbinukbukay ni Thai Kaichon Sor Vorapin (25-10, 9KOs) ug si Joseph Von Minoza (12-2, 5KOs) moharong sa South Korean fighter Yoo Shin Kim (8-2, 6KOS). (BANAT SPORTS)