CCSC mobuak sa world record
CEBU, Philippines - Walingon sa Cebu City Sports Commission (CCSC) ang katapusang babag aron ilang makab-ot ang talagsaong ambisyon pagbuak sa Guinness record alang sa "World's Largest Chess Tournament" sa Board Game category sa final competition nga sugdan karong ala-1 sa hapon diha sa Cebu City Sports Center.
Ang CCSC sa pakigtambayayong sa Department of Education (DepEd) naglaum nga mapatik na sab sa kasaysayan ug mabutang ang Cebu City sa world map pinaagi niining bag-ong record-breaking attempt.
Sa kasamtangan, ang Russia mao ang naghupot sa rekord dihang 1,214 ka partisipante ang misalmot sa kalihukan nga gipasiugdahan ni Eugene Kuznitsov niadtong Hunyo 2, 2007 didto sa Central City Park sa Krasnoyarsk.
Malaumon si CCSC chairman Edward Hayco nga ilang mabuak ang rekord dihang nikuha sila og kapin sa 43,000 ka partisipante alang sa maong talagsaong misyon.
Ang 43,000 ka mga bata nagtigi sa milabay'ng duha ka bulan sa walay putol nga classroom ug school-wide competitions gikan sa kapin sa 100 ka eskwelahan dinhi sa siyudad sa Sugbu. Ang nahabiling 3,000 moabante ngadto sa penultimate battle karong adlawa.
Sa dili pa ang contest proper karong adlawa, usa ka talagsaong ceremonial opening move ang gipaabot nga makapahingangha sa mga partisipante, guests ug dumuduong.
Agi'g pagdugang og bulok alang sa halandumon nga kalihukan, ang mga sakop sa Dancesport-Team Cebu City (DTCC) mopasundayag og talagsaong production number diin sila morampa og unique chess movements, uban sa 32 ka mananayaw morepresentar sa chess pieces sa usa ka higanteng chess board.
Tulo ka FIDE arbiters ang nalambigit sa pagpahigayon sa duha ka adlaw nga kalihukan nga sila si Felix Poloyapoy (chief arbiter), Luis Navaja sa University of Cebu ug Roger Abella (tournament director). (BANAT SPORTS)
- Latest
- Trending
