MANILA, Philippines - Muli na namang sasabak ang Philippine Azkals sa isang charity match sa pakikipagharap sa South Korean team na Incheon Citizens bukas sa Rizal Memorial Stadium sa ganap na alas-6 ng gabi na mapapanood nang live sa Studio 23.
Isasagawa ang labanang tinatawag na ‘Kia Rio Cup’ para matulungan sa pamamagitan ng ABS-CBN Sagip Kapamilya ang mga nabiktima ng bagyong ‘Sendong’ noong Disyembre.
Bagama’t wala sa laban ang ilang Azkals na nakabase sa Europe dahil na rin sa kanilang mga obligasyon sa kani-kanilang mga clubs, maglalaro naman sina Phil at James Younghusband, Chieffy Caligdong, Ian Araneta at Anton del Rosario.
Unang naglaro sa isang charity match para sa mga biktima ng ‘Sendong’ ang Azkals noong Enero 7 kung saan nakaharap nila ang CF Internacional Madrid ng Spain.
Higit sa P1.5 milyon ang nalikom ng laro.