CEBU, Philippines - Sangkaon na ni undefeated ALA boxing prospect Prince Albert Pagara ang beteranong si Lowie Bantigue sa main event sa "ALA-Cobra Energy Drink-Tunay na Lakas Boxing" karong gabii didto sa Gaisano Countrymall carpark.
Ang manghod ni knockout artist Jason Pagara nagbitbit og 9-0 record, samtang si Bantigue adunay 21-16-7, 12KOs
Daku kining hagit alang ni Pagara tungod kay dili basta-basta si Bantigue nga maoy Philippine ranked No. 7 ug Oriental Pacific Boxing Federation contender.
Sa supporting bout, si Welbeth Loberanis sa Mandaue City makigharong ni Jonathan Ricablanca, samtang ang undefeated nga si Melvin Gumban makigsangka ni Joash Apericio.
Ang stablemate ni Pagara nga si Roma Rate makigbinukbukay ni Rowel Garcia sa Koronadal City ug si Mark Vincent Bernaldez makigsinukliay'g kumo batok ni Roy Roy Sumugat sa Bacolod City.
Mohimo sa iyang pro debut karong gabii si four–time national amateur champion Juren Labordo batok ni Taos Basar, samtang si Rey Morales moaway batok ni Renante Suacasa. (BANAT SPORTS)