CEBU, Philippines - Ang bag-ong sakop sa Southwestern University (SWU) Cobras nga si Mendjana Mbala posibleng maoy tubag sa ilang damgo nga modaog og korona sa umaabot nga Cebu Schools Athletic Foundation Inc. (CESAFI) season ug umaabot nga star player kay nagpakita kini og senyales.
Si Mbala mipabuto'g 22 puntos aron pangulohan ang Cobras pagkulit og daog, 82-75 batok sa University of the Visayas (UV) Green Lancers sa usa ka pisikal nga exhibition match didto sa Dapa Municipal gym sa Siargao island sa Surigao del Norte niadtong Miyerkules sa gabii.
Si Mbala, kinsa adunay gitas-on nga 6-foot-6 sama sa laing taga-Cameroon nga si Justin Aboude moduwa uban sa Cobras sa CESAFI niini nga season. Nakahuygo og maayo si Mbala tungod sab kay wala mokuyog ang prized-catch sa UV nga si ex-Lyceum Pirate Hernan 'Wowie' Escocio nga motimbang unta nilang Rene Jun Saycon ug Andrew Avillanoza.
Silang Aboude ug Bong Guillena parehong miamot og 14 puntos alang sa Cobras, kinsa maoy nagkontrolar halos sa kinatibuk-ang duwa.
Ang beteranong si Jerome Silva maoy nangu sa Lancers pinaagi sa iyang 21 puntos, samtang ang comebacking guard nga si Eman Calo ug ang point guard nga si John Abad nagkumboya og 23 puntos.
Sa preliminary, ang Dapa All-Star ubos ni Mayor Peter 'Boy' Ruaya nakaikyas sa PNP Selection sa iskor nga 80-72.
Ang assistant coach sa Cobras nga si Rey Potot maoy nangu sa Dapa nga mibahog og 34 puntos, samtang si Ruaya miamot og 13 puntos.
PUNTOS MATAG USA
SWU (82) - Mbala 22, Aboude 14, Guillena 14, Arong 6, Castro 6, Nalos 5, Casquejo 5, Bregondo 4, Dedace 2, Escobio 2, Goloran 2
UV (75) - Silva 21, Calo 12, Abad 11, Mercader 9, Perolino 7, Avillanoza 4, Oktubre 4, Arong 3, Mendoza 2, Kadir 2 (BANAT SPORTS)