Ambasa, Tabal dili modagan sa 42k cebu city marathon

CEBU, Philippines - Seguradong adunay bag-ong kampiyon sa 42K full marathon sa Cebu City Marathon human ang duha ka Pinay top contenders mipahibalo nga adto modagan sa 21K half marathon.

Ang lumad nga taga-Davao City ug reigning women’s champion nga si Monalisa Ambasa dili modepensa sa iyang titulo ug ang iyang runner-up ug Cebu running princess nga si Mary Joy Tabal human makahukom nga adto modagan sa 21K.

Gawas nilang Ambasa ug Tabal, dili usab modagan sa 42K marathon si Mary Grace Delos Santos. Ang reigning National Milo Marathon champion nga si Delos Santos modepensa sa iyang titulo sa 21K female category.

Samtang sa 42K men’s category, gipaabot nga mangharos na usab ang mga Kenyans, apan gawas nila anaa usab ang mga elite foreign runners gikan sa Norway, Germany, United Kingdom, Singapore, Japan, Hong Kong ug United States.

Usa sa mga organizers nga si Pearl Jacalan sa Cebu Executive Runners Club nagkanayon nga dili masirohan ang mga local runners tungod kay gawas sa overall championship, hatagan usab nila og ganti ang mga Pinoy top performers sa 42K class.

Sa pagka karon, miabot na sa 7,022 ka runners ang nakaparehistro, apan gipaabot nga motubo pa kini atol sa katapusang adlaw sa registration karong adlawa.  (BANAT SPORTS)