Boom boom daog via K.O.

CEBU, Philippines - Gitinuod nila ni Rey ‘Boom Boom’ Bautista ug Mexican knockout artist Miguel Mendoza nga mag-gera sulod sa ring, apan sa uwahi ang ALA Boxing Gym superstar ang mipatigbabaw sa main event sa ‘Pinoy Pride X’ sa miaging gabii didto sa Hoops Dome sa Lapu-lapu City.

Si Bautista milampos pagdepensa sa iyang IBF International featherweight title pinaagi sa usa ka sixth round knockout batok ni Mendoza sa usa ka duguon ug kulbahinam nga sangka.

Sama sa ilang saad, walay daganay ang gibuhat sa duha ka boksidor nga nagbinayloay sa ilang makabungog nga kinumo sugod sa first round hangtud sa naundang ang away sa sixth round.

Kaduha gitumba ni Bautista si Mendoza sa unang round, apan nakabawi ang Mehikano ug mao na usab ang mirombo ni Bautista gamit ang iyang mga makusug nga hook shot sa lawas ug ulo sa Pinoy fighter.

Nahunong sa makadiyot ang away human naglalis ug gipalagpot ni referee Danrex Tapdasan ang usa sa mga cornermen ni Mendoza human siya gisiko niini dihang miduol siya aron kumustahon ang Mexican boxer.

Gipadayon ang away, apan ning higayuna hingpit nang gidispatsar ni Bautista ang Mehikano pinaagi sa usa ka nagpungasi nga left hook. Miaksiyon pa og bangun si Mendoza , apan pakyas siya pagtubag sa ihap ni referee Tapdasan sa oras nga 1:20 sa maong round.

“Mo-angkon ko nga galisod ko sa fight kay kusog kaayo iya sukmag pero nagpasalamat ko kay na-apply nako ang gitudlo ni coach,” matud pa ni Bautista kinsa mipalambo sa iyang record ngadto sa 31-2, 23KOs, samtang si Mendoza nakahiagum sa labing una niyang pilde sud sa 18 ka away.

“He still looks vulnerable but let's see, we will have to give him more fights like this, but good thing pud we saw Boom Boom matured” matud pa usab ni ALA Promotions president Michael Aldeguer.

Sa supporting bout, gitumba og kaduha ni ALA prospect Genesis Servania ang Mehikano nga si Marcos Cardenas sa wala pa kuhaa ang 12-round unanimous decision nga kadaugan.

Si Rocky Fuentes mipaundang ni Thai Tor Buamas sa 2:55 sa second round, samtang si Romeo Jakosalem miangkon sa OPBF light welterweight title pinaagi sa usa ka dominanteng unanimous decision nga kadaugan batok ni Pan Soo Kim sa South Korea. (BANAT NEWS)