CEBU, Philippines - Ang katapusang hugna sa 2011 MS Motosuit Series nga pagauloha'g "Isabelito Darnayla Cup" himuon karong Disyembre 18 didto sa Basak Sudtongan, Lapu-Lapu City.
Ang ikasiyam ug katapusang leg gitakda unta niadtong miaging Domingo, apan gisibog kini sa mga organizers tungod kay wala pa man mahuman og trabaho ang racetrack.
Tungod niini, gilauman sa organizers nga modaghan pa ang mga riders ang mosalmot sa maong kompetisyon ni MS Motosuit big boss Lou Ornopia.
Dili lang ang dungog ang giapas sa riders, kun dili lakip na sab sa puntos nga kinahanglanon alang sa ilang overall rankings.
Ang organizers sa maong kalihukan wala mopagawas sa overall standings human sa walo ka legs sa tuyo nga maningkamot og maayo ang mga riders.
Gipaluyohan sab sa Petron, ang lumba gihimo agi'g pahinungod sa kapistahan sa mahal nga patrona sa Basak Sudtongan, Birhen Maria Santisima sa Kalooy. (BANAT SPORTS)