MANILA, Philippines - Kagaya ng dapat asahan, nakamit ng Llamados ang ikalawa at huling ‘twice-to-beat’ advantage sa quarterfinal round kasabay ng pagpapalasap sa Clickers ng pinakamasamang win-loss record sa 37 taon ng Philippine Basketball Association.
Ito ay matapos talunin ng B-Meg ang talsik nang Shopinas.com, 86-74, upang dumiretso sa kanilang pang walong sunod na arangkada sa elimination round ng 2011-2012 PBA Philippine Cup kahapon sa Smart-Araneta Coliseum.
May 10-4 baraha ngayon ang B-Meg sa ilalim ng nagdedepensang Talk ‘N Text (10-3) kasunod ang Petron Blaze (9-5), Rain or Shine (8-5), Meralco (8-6), Barangay Ginebra (7-5), Barako Bull (6-7), Powerade (6-8) at mga sibak nang Alaska (3-10) at Shopinas.com (0-14).
Kasalukuyan pang naglalaro ang Kings at Energy habang isinusulat ito.
Ang 0-14 baraha naman ng Clickers ang pinakamasamang kartada ng isang koponan sa PBA matapos ang 0-13 ng Great Taste sa 1982 All-Filipino Cup at ang 0-13 ng Country Fair sa 1984 Reinforced Conference.
Ang Shopinas.com ang pangatlong team na hindi nanalo sa isang conference matapos ang Air21 (2011 Governors Cup) at Pop Cola (1999 Governors Cup).
Kaagad na kinuha ng B-Meg ang 19-2 abante sa 4:38 ng first period mula sa isang three-point shot ni Josh Urbiztondo bago inilublob ang Shopinas.com sa 37-15 sa 7:55 ng second quarter galing sa basket ni Yancy De Ocampo.