Rivera, Clutario kumikikig pa, pasok sa Last 8 sa World Cup
MANILA, Philippines - Naipagpatuloy nina Biboy Rivera at Liza Clutario ang magandang bitiw sa bola para makausad sa top 8 sa men’s at women’s division sa ginaganap na Qubica AMF Bowling World Cup sa Northcliff Bowling Center sa Johannesburg, South Africa.
Matapos ang walong games si Rivera ay nakapagtala na ng kabuuang 6500 puntos o 232.14 average para malagay sa ikapitong puwesto.
Nangunguna pa rin si Tommy Jones ng USA matapos ang 28 games sa 6739 puntos o 240.68 average habang sina Jason Belmonte ng Australia (6702), Mykhaylo Kalika ng Ukraine (6681), Kimmo Lehtonen ng Finland (6534), Lucas Legnani Argentina (6534) at Mats Maggi ng Belgium (6520) ang nasa ikalawa hanggang ikaanim na puwesto.
Si Francois Louw ng South Africa ang kumumpleto sa unang walo sa kalalakihan sa 6470.
Gumawa naman ng 6094 iskor si Clutario o 217.64 average para malagay sa pang-anim na puwesto.
Ang nagdedepensang kampeon na si Aumi Guerra ng Dominican Republic ang nasa itaas sa 6,748 habang sina Diandra Asbaty ng USA (6408) Cherie Shi Hua Tan ng Singapore (6242), Sandra Andersson ng Sweden (6199) at Krista Pollanen ng Finland (6158), ang nasa ikalawa hanggang ikalimang puwesto.
Sina Wendy Kok ng Netherlands (6,072) at Lisa John ng England (5,984) ay pasok sa Top 8 sa kababaihan.
- Latest
- Trending
