CEBU, Philippines - Segurado na nga ang Sugbu maoy mo-host sa 2012 Ironman 70.3 Philippines, ang labing dakung triathlon event sa nasud nga gitakda sa Agosto 5 didto sa Shangri-la Resort sa Mactan Island.
Anaa gihapon sa lista ang Camarines Sur nga maoy binyu alang sa Ironman race sa sunod tuig sa official site sa lumba, apan giklaro sa mga organizers nga ilisan na nila kini og Cebu nga mao nay mo-host sunod tuig.
Ang multi-awarded sportsman nga si Oscar 'Boying' Rodriguez Jr. mitug-an sa The Freeman, ang igsuong pamantalaan sa Banat News, gisekreto una nila kini kaniadto, apan gikompirmar na nila nga sa Sugbu na mahitabo ang Ironman human usab maplansa ang tanang detalye sa lumba.
Tungod sa kadaku sa lumba, sirad-an ang mga dagkung kadalanan sa Sugbu lakip na ang duha ka taytayan sa Mactan.
Apil sa rota sa lumba ang mga siyudad sa Lapu-Lapu, Mandaue, Talisay ug Cebu City.
"I’m sure that whatever inconvenience this event will bring, mas daku ang ma-benefit sa Cebu ani. Daku ang paglambo just like what happened in CamSur. So I hope everyone cooperates and understands," matud pa ni Rodriguez. (BANAT SPORTS)