BOC midaug vs. ICTO

CEBU, Philippines -  Human makaangkon og sagunson duha ka pilde, midaug pag-usab ang Bureau of Customs (BOC) ug ilang gipanitan ang Information Communication Technology Office (ICTO-7) sa iskor, 81-38 aron mokulit og labing dakung winning margin sa kasaysayan sa nagpadayong Association of Regional Executive in National Agencies (ARENA-7) basketball tournament kaniadtong Biyernes sa hapon didto sa Sacred Heart School gym sa dan Gen. Maxilom avenue, ning dakbayan.  

Midaug sa ilang debut and BOC ni team manager ug District Collector Atty. Ronnie Silvestre apan napandol siya sa duha ka higayon ug karon naghupot na sila og 2-2 nga baraha.

Tinguha karon sa BOC nga mokulit sa ilang ikatulong daog aron magpabiling buhi sa ilang kampanya sa semifinals diin upat lang ang mo-abante sa Group B ubos sa 40 years old above division dihang ilang ikasangka ang Cebu Technological University (CTU).

Tungod kay humana man nila ikasangka ang mga lig-on nga teams, masaligon ang mga players sa BOC nga makuha nila ang ika-upat nga pwesto sa semifinals.

Ang 43 puntos nga kadaugan maoy labing dakong winning margin sa kasamtangan nga torneyo.

Parehong miposa og 12 puntos silang Jan Mose ug Ronan Cañete dihang ilang gidominar ang ilawom samtang mipugnit na sab og double-double ang ilang point guard nga si Boodie Monteño kinsa mihimo’g 10 puntos ug 12 ka assists.

Si Bong Mabalo ug Jingjing Rama miamot og nunye ug otso puntos matag usa alang sa BOC.

Silang Bingo Matugas, Ferdie Laraga ug Jojo Quiño pulos miligwat og sayis puntos matag usa

Laba gisubha'g daog batok sunday club

Gisubhan dayon og daog ang mas teamwork nga Los Amigos Basketball Association (LABA) dihang ilang gipukan ang Sunday Club sa iskor 84-72 atol sa pagbukas sa Mandaue City 1st Vice-Mayor’s Cup Inter-Club Basketball Tournament (40 years above) kagahapon didto sa Mandaue City Cultural and Sports Complex.

Ang maong torneyo nga gisalmotan lang sa mga molupyo sa Mandaue ug walay labot niini ang mga kanhi varsity ug mga commercial players.

Ang ilang tema mao “Panaghigaalay ug Panaghiusa pinaagi sa Paugnat sa Kusog”.

Adunay 16 ka teams ang misalmot sa maong torneyo ug gibahin kini sa duka ka brackets.

Ang LABA ug Sunday Club parehong nahimutang sa Group B kauban ang Haplas, Solita, Seire, SRP-A, OBMA ug LHBC.

Ang mga teams nga sakop sa Group A mao ang Mandaue City Basketball Association (MCBA) nga gipangulohan ni Ronald Lim, Triple A, LABA-B, PPFC, Club K, SRP-B, PDBC ug Mandaue Basketball Association (MBA) nga gipangulohan ni Benedict Chua.

Walo tanan ka duwa ang gipahigayon atol sa opening kagahapon gikan sa buntag hangtod na ngadto sa gabii.

Adunay duwa matag gabii diin ilang gisagop ang home-and-away format diin adunay kahigayonan nga mo-host ang matag team kung diin sila nga barangay sa Mandaue nahisakop.

Ang top 2 sa matag bracket maoy mo-abante ngadto sa crossover semifinals diin ang no. sa Group A makigsangka sa no. 2 sa Group B ug ang no. sa Group B makigsangka sa no. 2 sa Group A. Ang modaug sa crossover semifinals maoy mag-abot sa championship ug ang mapilde maoy mag-ilog alang sa ikatulong pwesto.

Gikatakda nga mahuman ang maong torneyo sa Disyembre 18 matod pa ni tournament chairman Petro Gesulga. (BANAT NEWS)