Maierhofer, Maliksi gustong kunin ng Ginebra
MANILA, Philippines - Nasasangkot sa isang three-team trade ang Barangay Ginebra, B-Meg at Barako Bull.
Gustong mahugot ng Gin Kings sina Rico Maierhofer ng Llamados at rookie Allein Maliksi ng Energy.
Ipapalit ng Ginebra kay Maierhofer si 6-foot-8 Yancy De Ocampo, habang ipamimigay nila sa Barako Bull si Jimbo Aquino at ang kanilang 2014 at 2015 second round draft picks.
Si PBA Commissioner Chito Salud ang magdedesisyon kung matutuloy ang nasabing mga trade deals.
Samantala, papatatagin pa ng Talk N’Text ang pagkakakapit sa liderato sa elimination round ng 2011-2012 PBA Philippine Cup sa pagharap sa Shopinas.com. ngayong alas-5:15 ng hapon sa Smart-Araneta Coliseum.
Angat sa laban ang Tropang Texters na balak kunin ang ika-pitong panalo sa walong laban sa kanilang pakikipagtagisan kontra sa Clickers.
Tangan ng Talk ‘N Text ang liderato sa bisa ng kanilang 6-1 rekord kasunod ang Rain or Shine (7-2), Petron Blaze (6-3), Barako Bull (5-3), Meralco (5-4), B-Meg (5-4), Ginebra (4-4), Powerade (3-5), Alaska (1-7) at Shopinas.com (0-8).
May apat na sunod na panalo ang Tropang Texters ni coach Chot Reyes at napahinga sila ng isang linggo.
Ang Clickers ni coach Franz Pumaren ay hindi pa nakakatikim ng panalo matapos ang walong laro.
Magtutuos naman ang Meralco at Powerade sa ikalawang laro sa alas-7:30 ng gabi.
- Latest
- Trending
