MANILA, Philippines - Nakumpleto ni Jessie Collado ang mahalagang three-point play upang angkinin ng Big Chill ang 62-61 panalo laban sa minamalas na DUB Unlimited sa PBA D-League Aspirants Cup kahapon sa Yñares Arena sa Pasig City.
Tabla ang iskor nang malusutan ni Collado ang depensa ng kalaban at sunod dito ay bumanat ng malayong jumper si John Gonzales sabay tunog ng final buzzer.
Matapos rebisahin ng mga referee, idineklara nilang 2-pointer lamang ang naipasok na ito para manalo ang Super Chargers at makasalo sa Cebuana Lhuillier at Freego Jeans sa unahan sa 3-0 karta.
Nalaglag naman ang Wheelers sa ikaapat na sunod na pagkatalo para manatili sa huling puwesto.
Sinandalan naman ng RnW Pacific Pipes ang mainit na paglalaro ng sentrong si Jordan Sanvictores sa hulilng yugto upang itabla ang karta matapos ang apat na laro gamit ang 80-76 panalo sa Café France.
Hinabol ng Steel Masters ang 15-puntos na kalamangan ng Bakers at si Sanvictores ang siyang nanguna rito nang maghatid ng 11 sa kabuuang 17 puntos sa laro.
Nanguna sa tropa ni coach Topex Robinson si Fil-Am Virgil Buensuceso sa kanyang ginawang 19 puntos.