CEBU, Philippines - Sa tuyo nga mapadayon ang legasiya sa mitaliwan niyang amahan, si Lapu-Lapu City Councilor Harry Radaza mopasiugda og 2nd Frankie Radaza Run karong Disyembre 3 didto sa Centennial Park ubos sa Marcelo Fernan bridge.
Giatol kini sa adlaw'ng natawhan sa manghod ni Congressman Arturo Radaza nga si Frankie Radaza, usa ka abogado ug philanthropist. Si Frankie namatay sa plane crash 11 na ka tuig ang nakalabay.
"December 3 is the birthday of my Dad. We are doing this in his memory. He was a philanthropist.
He always had the heart for
giving," matud pa ni Radaza atol sa press conference kagahapon didto
sa Max’s Restaurant sa SM City-Cebu.
Gibahin sa tulo ka kategoriya -- 12K, 8K ug 4K, ang lumba gitawag sab og "Four Bridges Run" tungod kay ang 12K ug 8K moagi sa duha ka taytayan sa makaduha ka higayon.
Imbes ganting salapi, si Radaza mitug-an nga finisher shirt ug specially-designed medal ang madawat sa mga top finishers sa matag kategoriya.
Niadtong interesadong mosalmot, ang registration fee nagkantidad og P250. Mahimong magparehistro sa Lapu-Lapu City Hall lobby, RUNNR sa Ayala Center-Cebu, Laser Art sa SM City-Cebu ug Sangguniang Kabataan (SK) offices sa mga barangay hall sa Lapu-Lapu City. (BANAT NEWS)