SHS-AdC nakauna sa series

CEBU, Philippines - Naunhan sa Sacred Heart School-Ateneo de Cebu (SHS-AdC) Magis Eagles ang topseed University of the Visayas (UV) Baby Lancers pinaagi sa pag-iskor og 94-82 nga kadaugan sa Game-1 sa ilang "best-of-five" championship series sa secondary division sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.

Ang Magis Eagles, kinsa mipalagpot sa defending champion Cebu Eastern College (CEC) Dragons mipakita sa ilang kaagresibo ug mas maayo sab silang nakaduwa itandi sa Baby Lancers hinungdan nga nakabiya sila og daku.

Nilabaw ang Magis Eagles og 16 puntos, 92-76 nga nagpaila nga determinado silang molangkat sa korona nga mihaplot sa ilang mga kamot sa miaging tuig.

Sila si Jari Igna ug Aaron Sing maoy nakahimo og dakung danyos sa UV kay pirme kining mosukli og triple sa matag higayon mo-rally ang Baby Lancers.

Si Igna miposa og upat ka triples sa iyang 16 puntos, apan si Patrick Go maoy topscorer sa iyang 19 puntos alang sa Magis Eagles, kansang unom ka players miposte og double figures. Si Julius Cadavis mihabwa og 12 puntos, sila si Sing ug Maverick Suarez mibugwak og 11 puntos matag usa, samtang sila si Henric Dawn Ochea ug Dave Yu miposte og 10 puntos matag usa.

Si Andres Paul Desiderio maoy nangu sa Baby Lancers sa iyang 28 puntos, gisundan ni Reeve Ugsang nga adunay 15 puntos, samtang sila si Matthew Oche ug Dexter Lucero nagkumboya og 22 puntos. (BANAT SPORTS)