Dragons nakaginhawa pa

CEBU, Philippines - Buhi pa ang Cebu Eastern College (CEC) Dragons sa ilang kampanya alang sa bakanteng lingkoranan sa finals dihang mibugwak kini og makahilos nga opensa aron pagbuntog sa Sacred Heart School-Ateneo de Cebu (SHS-AdC) Magis Eagles, 59-52 sa secondary match sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.

Sa maong kadaugan, ang Dragons mipuwersa ngadto sa playoff alang sa ikaduhang luna sa finals.

Ang Dragons, kinsa nidaog sa labing unang higayon sud sa tulo ka mga duwa batok sa Magis Eagles niini nga season, milusad og 14-0 sa nanghinapos nga bahin sa third quarter hangtod sa sayong bahin sa final period diin sila niposte sa labing daku nilang labaw nga 17 puntos, 56-39 human sa triple ni James Neil Sumayang.

Ang three-pointer ni Aaron Sings maoy mitapos sa taas nga huwaw sa Magis Eagles sa 6:35 nga nahabiling oras sa fourth quarter, ang una nilang basket sukad si Julius Cadavis mi-iskor sa oras nga 3:23 sa third period diin niadtong higayona naalkanse sila og tres puntos, 39-42.

Gitapos sa Dragons ang ikatulong kuwarter uban ang sunod-sunod nga nuybe puntos, lima gikan ni Sumayang ug ang upat gikan ni Alfred Sedillo aron moposte og 51-39 nga bentaha.

Gipangulohan ni Sumayang ang Dragons nga mibugwak og 15 puntos, samtang si Marvin Bauya, ang All-Star MVP sa 11th CESAFI All-Star Games, mitukob og 13 puntos ug si Sedillo mitusik og 11 puntos.

Si Sing miposa og upat ka triples aron pangulohan ang Magis Eagles uban ni Maverick Suarez nga parehong adunay tag-13 puntos, samtang si Cadavis miabuno og 11 puntos. Usa sa ilang sinaligan nga si Henric Dawn Ochea gilimitahan lang ngadto sa kuwatro puntos.  (BANAT SPORTS)