White ug Red nagsawo sa liderato

CEBU, Philippines - Gipukan sa White Team nga gipaluyohan sa Blackwater ang Blue Team nga gisuportahan sa Byrhon Merchandise ug mikulit og 60-50 nga kadaugan alang sa ilang ikatulong daog atol sa pagtapos   sa first round of elimination sa nagpadayong Power Dealer Basketball Club (PDBC) 2011 Inter-Color basketball tournament didto sa Sacred Heart School gym sa dan Gen. Maxilom avenue, ning dakbayan.

Sa laing duwa, ang Red Team ni Cris Uy mi-iskor og usa ka come-from-behind nga kadaugan batok sa mas paboritong Yellow team nga gisuportahan sa Royale Power Dream   ug skipper Arnold De Asis kinsa milansang sab sa ilang ikatulong sagunson nga daug human sa ilang 70-67 nga kadaugan sa overtime.

Init sa first period ang White aron molabaw, 18-8 rally pinaagi sa mga puntos gikan sa ilang power-forward nga si Canjo Echavez apan mibawos ang Blue ginamit ang 12-7 run didto sa second period nga giduslitan ni Flor Sayson aron mosikit sa halftime, 20-25.

Padayon gihapong naglabaw ang White, 40-37 pagsugod sa final quarter aron modaug og 10 puntos. Si Echavez maoy nangu sa White team sa iyang 20 puntos samtang pulos miamot og double figures silang   Marcial Fernandez, Cris Romares ug Aldrin Gonzaga.

 Si Sayson maoy nangu sa Blue sa iyang game-high 22 puntos.

Sa main game, kanunay naglabaw og double digits ang Yellow Team sulod sa tulo ka periods ug miposte sa ilang kinadak-ang labaw nga 14 puntos, 52-38   sa pagkumboya nilang De Asis, Weljohn Alarde ug Chuck Rosal apan mi-apas ang Red didto sa fourth period aron pagpugos ug overtime.

Mipabuhagay og 23-9 nga rally ang Red sa fourth period ubos sa init kaayong gunner nga si Fred Vitug   uban ni Clint Suelto      aron papason ang 14 puntos nga biya hangtod nga nagtabla kini ngadto sa 61 all atol sa regulation.

Napugngan sa Red   ang Yellow ngadto lang sa sayis puntos didto sa overtime period aron sila maka-ipsot.

Si Vitug maoy nangu sa Red sa iyang 30 puntos ug si   Suelto miamot og    21 puntos     samtang ang Yellow gipangulohan nilang De Asis ug Alarde kinsa parehong mihipos og 16 puntos matag usa ug ang kanhi   Lancer    nga   si     Rosal     miligwat og 15 puntos.

Puntos matag usa:

First Game:

WHITE (60)- Echavez 20, Fernandez 11, Romares 10, Gonzaga 10, Bonifacio 3, Cavan 2, Antipuesto 2, Manyao 2. 

BLUE (50)- Sayson 22, Maboles 11, N. Castelo 7, Sagario 4, Retuya 2, Rotersos 2, Curaroton 2. 

Second Game:

RED (70)- Vitug 30, Suelto 21, Sevilleno 6, Patiluna 4, Uy 3, Dolino 2, Pollvora 2, Pepito 2.

YELLOW (67)- De Asis 16, Alarde 16, Rosal 15, Vergara 11, Sabella 5, Espina 2, Logronio 2.  - BANAT NEWS