CIT-U mipilde sa USPF

CEBU, Philippines -  Mikuhit og 25 puntos matag usa ang topgunner nga si Nikko Otadoy ug center Mark Kong aron pangulohan ang Cebu Institute of Technology-University (CIT-U) Wildkittens pagtukob og 84-71 nga kadaugan batok sa University of Southern Philippines Foundation (USPF) Baby Panthers sa secondary match sa 11th Cebu Schools Athletic Foundation Inc. (CESAFI) basketball event kagabii didto sa Cebu Coliseum.

Si Otadoy mipasulod og lima ka triples, duha niini sa fourth quarter nga maoy instrumento sa ilang pagkontrolar sa labaw, bisan pa sa mga rally sa Baby Panthers hangtod nga si John Cle Molero mitusak sa iyang duha ka free throws nga naghatag sa Wildkittens sa ilang kinadak-ang labaw nga 13 puntos sa iskor nga 72-59.

Ang Wildkittens nilabaw og 10 puntos sa unang kuwarter dihang si Otadoy miposa og duha ka triples.

Si Gerald Delima mihungit og 18 puntos alang sa Wildkittens, kinsa miinat sa ilang 6-7 win-loss record ug ang bugtong nilang paglaum nga makasud sa semifinals mao ang pagharos sa ilang nahabiling tulo ka mga duwa.

Epektibo sab ang depensa nga gipatuman sa Wildkittens diin ilang napugngan ang leading scorer sa Baby Panthers nga si Rommel Diapera ngadto lang sa 17 puntos.

Si Winston Bolivar, kinsa mihipos sab og 25 puntos maoy nangu sa Baby Panthers, kansang ilang 9-6 win-loss record igo na kaayo kanila pagtugpa sa ikaupat nga dapit sa semifinals nga sugdan karong Oktubre 18.

Hinuon, mameligro ang Baby Panthers sa ilang kampanya sa semis kun ang Wildkittens makigtabla sa ilang baraha tungod kay nidaog lang sila og kuwatro puntos batok sa mao gihapon nga kontra sa first round, 89-85 ug napilde og 13 puntos kagabii. (BANAT NEWS)