Gary Cortes, ex-Lancer shooter karon usa ka Customs forwarder

CEBU, Philippines -  Sa nagduwa pa kanhi isip sakop sa University of the Visayas (UV) Green Lancers si Gary Cortes o mas nailhan sa tawag nga “Garycorts” sa iyang mga higala sa basketball circle, malingaw ka nga magtan-aw kaniya tungod sa iyang matang sa duwa nga iyang ipakita sa team. Mo-igo og three points, isog modepensa ug labaw nang dili sad magpabentaha kung physical game ang hisgotan ug kung imo siyang unahan ug minaldito sa duwa, dili ka gyud magmahay ni Garycorts kay suklian ka niya og daku-dako nga dili nimo malimtan sa tibuok nimong kinabuhi.

Si Cortes kauban ni coach Felix “Donbel” Belano sa Lancers ug ingon man sa iyang coaching staff nga sila si Augustus Abelarde ug Shelwyn Wagwag nga ubos ni kanhi coach Jerry Aratan, sakop sa UV Lancers champion team niadtong ilang panahon gikan sa uwahing bahin sa 1980 ug sayong bahin sa 1990.

Busa, dili sab kahibudngan nganong kanunay na magpakita sa Cebu Coliseum si Cortes aron mosaksi sa mga duwa sa Lancers ning pipila na ka semana. Kanunay siyang mangutana kung unsay schedule sa UV ug interesado gyud siyang motan-aw sa mga duwa.

Sa miaging Huwebes, Septiyembre 29, misaksi si Cortes sa duwa sa UV batok USC Warriors ug bisa’g gamay na lang ang iyang na-abtan sa duwa, nalingaw siya dihang naka-ipsot ang Lancers sa iskor, 54-50.

Karong Oktubre 9, misaad na sab si Cortes nga motan-aw siya sa gikahinamang sangka tali sa Lancers batok sa SWU Cobras.

Human sa iyang career sa UV, nahimong commmercial player si Cortes sa Sunpride ug kanunay silang modaug sa ilang mga duwa dinhi sa Visayas ug Mindanao. Daghan pang teams ang mikuha sa serbisyo ni Cortes ug gawas sa Casino Rubbing Alcohol nga sister team sa Sunpride, dugay siyang nahimong sakop sa Chariot team ni team owner Recaredo Delfin Abellanosa Kingo RDAK, kanhi team manager Edwin Camins, kanhi team coordinator Julie Flores ug kanhi coach Norberto “Titing” Manalili.

Halos mga lega dinhi sa Sugbo—major o minor basketball leagues, kanunay ang Chariot maoy mahimong kampiyon ilabi na sa panahon sa pagsulbong sa Mandaue-Industrial Commercial Athletic Association (MICAA). Daw sa dili na maihap sa tudlo sa kamot kung kapila na mag-abot sa finals ang Chariot ug Kwarta Padala ni kanhi coach Eddie Ybañez ug kanunay modaug ang Chariot ug didto mamugma kining panultihon nga paborito kaniadto ni Flores nga “Padala’g Kwarta ipalit og Chariot”.

Dihang nabugnaw na ang MICAA, panagsa na lang sab mopakita sa basketball court si Cortes apan kanunay ang iyang pagsunod sa sports ilabi na sa basketball, boxing, billiards ug body building.

Wala madugay, akong nahibaw-an nga nagtukod diay og usa ka cargo forwarding business si Cortes ug malamposon kaayo ang iyang negosyo karon. Taudtaud na nga milambo ang negosyo ni Cortes ug sa iyang asawa. Kung dili kamo motuo, daw kusina lang ni Garycorts ang China, Hongkong ug Vietnam tungod sa pagsikat sa iyang forwarding business ug yano na lang niyang sakyon ug eroplano ang mga nasud dinhe sa Asia.

Usahay nga adunay higayon nga dili siya makatan-aw og CESAFI, mo-text dayon si Cortes nga tua siya sa Vietnam. Sa iyang kahamugaway karong panahona, mahimong nganhi sa Sugbo mamahaw si Cortes ug adto maniudto sa Hongkong ug adto manihapon sa China.

Duna sa’y higayon nga anha magpalabay og oras si Cortes sa lobby sa Waterfront modimdim sa mabugnaw nga beer. Usahay adto siya sa Marriott Hotel mokaon. Member siya sa Marriott Fitness Club diin adto siya magpakundisyon sa iyang lawas.

Sa imong na-angkon nga kalamposan Garycorts, swerte ka ug angayan kang daygon.

Saludo ako kanimo Garycorts, higalang walay paglubad ug wala mausab ang batasan sukad pa kaniadto. (BANAT NEWS)