Ateneo-FEU GAME 2 kanselado kay 'Pedring'

MANILA, Philippines - Malakas na hangin at wa­lang tigil na ulan dulot ng bagyong si Pedring ang nagtulak sa pamunuan ng UAAP na ipagpaliban ang sana’y ikalawang pagkikita ng Ateneo at FEU sa best- of-three men’s basketball finals kahapon sa Araneta Coliseum.

Naidaos ang laro sa wo­men’s at juniors pero mina­buti na lamang ng UAAP officials na huwag ng ituloy ang aksyon sa men’s division dahil sa patuloy na pag­sama ng panahon.

“Please be advised that due to inclement weather, the UAAP Board of Trus­tess has decided that the UAAP Awarding Ceremony and Men’s basketball Finals Game Two scheduled for today, September 27 will be postponed to October 1 (Saturday) at the Araneta Coliseum,” wika ng kalatas na ipinalabas ng pamunuan.

Ang mga nakabili ng ti­ket para sa laro kahapon ay tatanggapin naman sa Sabado.

Hanap sana ng Eagles na wakasan na ang best-of- three title series nila ng Ta­maraws upang makumpleto ang asam na 4-peat.

May momentum ang tro­pa ni coach Norman Black matapos durugin ang bataan ni coach Bert Flores, 82-64, sa Game One na ginanap nitong Sabado.

Naidaos naman kaha­pon ang ikalawang tagisan sa women’s at juniors basketball at nakahirit ang mga talunang koponan sa Game One para magkaroon ng do-or-die game na gagawin sa Linggo sa The Arena sa San Juan.

Gumawa ng 18 puntos at 6 assists si Raiza Palmera habang sina Allana Lim, Camile Sambile at Karen Columna ay may 17, 14 at 13 puntos para tulungan ang FEU sa 72-50 dominasyon sa nagdedepensang Adamson sa women’s basketball.

Ang panalo ay pambawi ng koponan sa tinamong 60-56 pagkatalo sa unang tagisan para magkatabla sa 1-1.

Buhay pa rin ang paghahangad ng National University na magkaroon ng titulo sa UAAP basketball nang bawian ang FEU-FERN, 57-46, sa ikalawang laro.