Wildcats gibalikosan sa Cobras

CEBU, Philippines - Mipabuto og 21 puntos si Joseph Nalos alang sa Southwestern University (SWU) nga milubong sa Cebu Institute of Technology-University (CIT-U) Wildcats, 94-81 niadtong Huwebes sa gabii sa 11th Cebu Schools Athletic Foundation Inc. (CESAFI) basketball event diha sa Cebu Coliseum.

Ang Cobras nga nagtangag na karon og 3-0 sa second round, miinat sa ilang win-loss record ngadto sa 6-3 ug mikamang paduol sa luna sa semifinals.

Si Bonifacio Guillena miduslit og 15 puntos diin iyang gitabangan ang Cobras sa paglingkawas gikan sa uhaw nga Wildcats. Sila si Rene Pacquiao, Eleazar Armeci, Monbert Arong ug 6-foot-6 center Justin Aboude mi-iskor sab og double figures.

Gilupig sa Cobras ang Wildcats sa pinuntosay sa second period aron moposte og 49-37 nga labaw sa halftime ug sukad niadto, ila na nga gikontrolar ang duwa.

Si Pacquiao milansang og 14 puntos, sila si Armecin ug Arong miposte og 13 puntos matag usa, samtang si Aboude adunay 10 puntos.

Ang Wildcats nga pabiling blanko sa siyam ka mga duwa, gipangulohan ni Allan Dimco, kinsa miposa og 16 puntos. Laing tulo niya ka teammates ang mi-iskor sab og double figures.

Sa bugtong duwa sa secondary division, ang Sacred Heart School-Ateneo de Cebu (SHS-AdC) Magis Eagles mi-rally sa katapusang singko minutos sa duwa aron pagpukan sa University of Cebu (UC) Junior Webmasters sa iskor nga 94-81. (BANATSPORTS)