Sweep itatarak ng Lady Troopers sa Stags
MANILA, Philippines - Pipilitin ng Philippine Army na wakasan ang kanilang championship series ng karibal na San Sebastian College-Recoletos upang ganap nang angkinin ang Shakey’s V-League Open Conference.
Magtatagpo ang Lady Troopers at ang Lady Stags sa Game Two ng kanilang best-of-three titular showdown ngayong alas-4 ng hapon sa The Arena sa San Juan.
Kasabay ng paglimita kay Most Valuable Player at best Scorer American import Lauren Ford sa 5 points, pinayukod ng Army ang San Sebastian via straight set, 25-9, 25-20, 25-16, sa Game One noong Linggo.
Kumpiyansa si coach Rico de Guzman na mawawakasan ng kanyang Lady Troopers ang kanilang serye ng Lady Stags ni mentor Roger Gorayeb.
Muling aasahan ng Army ang magkapatid na Michelle at Marietta Carolino kasama sina Rachel Ann Daquis, Joanne Buñag, Cristina Salak, Mary Jean Balse at Dahlia Cruz katapat sina Ford, Rubie de Leon at Thai import Jeng Bualee ng San Sebastian.
Ang tatlong araw na pahinga ang inaasahang nagpalakas sa Lady Stags, ang 2008 second conference champions, upang maitabla ang kanilang serye ng Lady Troopers.
Sa unang laro sa alas-2, tatangkain rin ng Philippine Navy na makagawa ng ‘sweep’ sa kanilang serye ng Ateneo De Manila University, ang first conference titlist, matapos angkinin ang Game One mula sa kanilang 25-22, 23-25, 25-19, 14-25, 15-8 tagumpay para maibulsa ang third place trophy.
- Latest
- Trending
