Panthers midagit sa Wildcats

CEBU, Philippines - Bisan og naggukod ang University of Southern PhilippinesFoundation (USPF) Panthers sa kinatibuk-ang duwa, nakahimo gihapon kini pagposte og daog batok sa Cebu Institute of Technology-University (CIT-U) Wildcats, 70-68 sa 11th Cebu Schools Athletic Foundation, Inc. (CESAFI) basketball season niadtong Domingo didto sa Cebu Coliseum.

Sa sayo pa, ang USPF Baby Panthers nimasaker sa University of San Jose-Recoletos (USJ-R) Baby Jaguars sa iskor nga 88-66.  

Maayo unta kaayong nakaduwa ang Wildcats ug sila maoy nagkontrolar diin nilabaw kini og siyete puntos, 58-51 human sa triple ni Floyd Taboada.

Imbes magkaguliyang, maisugong misumbalik ang Panthers pinaagi sa paglusad og 13-2 run sa pagpangulo ni Joseph Sedurifa, kinsa mi-iskor og three-point play aron mopaduol ngadto na lang sa kuwatro puntos, sa iskor nga 54-58 sa wala pa iloga ang labaw, 64-60.

Midugang og laing kuwatro puntos silang Sedurifa ug Anthony Linao aron inaton ang ilang labaw ngadto sa sayes puntos, 68-62 sa nahabiling 1:23 sa final period.

Si Alex Joseph Rabaya maoy mipasikit sa Wildcats sa katapusang higayon pinaagi sa usa ka steal, 68-70 sa katapusang 16 segundos sa duwa.

Ang 4-4 nga Panthers gipangulohan ni Sedurifa, kinsa mibahog og 14 puntos, samtang silang Linao ug Randy Avila mitampo og 11 puntos matag usa ug si James Ferraren midugang og 10 puntos.

Si Chester Curso miposa og 20 puntos alang sa Wildcats, si Rabaya miabuno og 16 puntos, samtang si Taboada adunay 12 puntos.

Sa sayo pa, ang University of the Visayas (UV) Baby Lancers mibuntog sa University of San Carlos (USC) Warriors, 84-72 ug ang Don Bosco Technology Center (DBTC) Junior Greywolves naka-ipsot gikan sa mga kamot sa University of Cebu (UC) Junior Webmasters, 76-75.  (BANATSPORTS)