Red vs. Green sa 2nd Abbariao Cup, RP vs. Chinese-Taipei sa Davis Cup

CEBU, Philippines - Nakasaad ako sa akong mga higala nga akong hisgotan dinhe sa SPORTSgab ang Davis Cup tennis ug ingon man usab kining torneyo sa Bureau of Customs nga gitawag og 2nd Maj. Alfonso C. Abbariao Cup Memorial basketball tournament. Managsilingan kining duha ka matang sa sports kay ang Davis Cup adto sa Lalapulapu City ug ang Abbariao Cup adto sa Mandaue City.

Niadtong Septiyembre 5, gidapit ako sa mga organizers sa Davis Cup Paribas press conference didto sa Casino Español de Cebu, ang maong adlaw nga gisirad-an sa makadiyot ang Ranudo street tungod sa napatay nga mga tulisan ug tungod kay udto man ang presscon, hawan ug hapsay na ang kalsada padulong sa Casino Español.

Gawas sa atong higalang si Jonji Y. Gonzales ug kanhi age-group tennis champion John Pages kinsa maoy presidente sa Sportswriters Association of Cebu (SAC), didto sa maong presscon ang aktibo kaayong sports leader sa Lapulapu City nga si Harry Don Radaza kinsa maoy haligi sa pagdala sa Davis Cup-Asia Oceana Group 1 showdown tali sa RP Team batok sa Chinese-Taipei nga pagahimoon sa tulo ka adlaw gikan sa Septiyembre 16-18 didto sa maanindot nga clay court sa Plantation Bay.

Mitambong sab sa maong presscon ang pipila sa mga representante sa Plantation Bay nga gipangulohan sa ilang marketing head nga si Benn Menodiado.

Ang RP Team kinsa bag-ohay lang napilde batok sa Japan sa Davis Cup niadtong Marso didto gihapon sa Plantation Bay, pagalangkuban nilang Cecil Mamiit isip team captain, Ruben Gonzales, Treat Huey ug Jeson Patrombon.

 Ang mga players sa Chinese-Taipei mao sila si Jimmy Wang, Hsin-Han Lee, Chu-Huan Yi ug Chia-Yen Tsai isip team captain.

Sa ilang head-to-head match-up, ang RP Team adunay 4-1 nga record batok sa Chinese-Taipei. Sa lima ka higayon silang nag-abot sa Davis Cup, upat ka higayon nga midaug ang RP samtang usa lang ka higayon midaug ang Chinse-Taipei ug 3-2 ang atong manok sa 1st round.

Human unya sa Davis Cup, pangulohan sab ni Radaza ang Lapulapu Fiesta Cup basketball tournament nga sugdan unya sa Septiyembre 24. Walay paghupas ang pagka-mahiligon ni Radaza sa tennis ug basketball ug sa lain pang mga natad sa sports nga makadani ug pagtagad sa katwahan ilabi na mga langyaw nga turista.

Matod pa ni Radaza, iyang hingusgan og maayo ang pag-promote sa sports tourism sa dakbayan sa Lapulapu.

Kanimo Harry, saludo kami!

Ato sab hisgotan dinhe ang Abbariao Cup diin ang finals tali sa defending champion Red batok Green pagahimoon sa Miyerkules, Septiyembre 14 didto sa Benedicto College gym sa A.S. Fortuna sa Mandaue City.

Suwayan sa Red team ni Boodie Monteño ang paglangkat sa ilang ikaduhang korona batok sa mao gihapong karibal. 

Si Monteño maoy usa sa sinaligan sa Red team ug iyang ikabagat pag-usab si Jingjing Rama, manghud ni Mayor Mike Rama, kinsa maoy sinaligan sa Green team ug ilang gipalig-onan ang ilang team sa pagkuha kang Noel Medalle kinsa mo-igo gikan sa three-point area.

Dili kaayo taas og hangin si Monteño apan nahimo siyang usa sa pambato sa ilang team tungod kay inutok kaayo ang iyang duwa ilabi na sa iyang position nga point guard. Kanunay siyang nag-average ug double-double sa maong torneyo. Ang team manager sa Red mao si Capt. Jerry Arizabal.

 Ang mag-ilog sa ikatulong pwesto mao gihapon ang Blue team ni District Collector Atty. Ronnie Silvestre ug ang Yellow team ni Mactan Collector Bingo Matugas, anak ni Congressman Francisco Matugas sa Surigao del Norte ug ni Gov. Sol Matugas sa mao gihapon probinsiya.

MISCELLANEOUS. My special birthday greetings to my daughter Nicole, a fourth year student of the University of San Carlos-South Campus who turned 16 years old last September 10 which also coincided with the feast day of San Nicolas de Toletino, the patron saint of barangay Sawang Calero. Yesterday was a special day for those who grieved during the infamous and atrocious terrorists attacks at the World Trade Center buildings in Manhattan, New York City last September 11, 2001. We are not Americans but the Filipinos who died during the attacks really touched our hearts in deep sympathy.  - BANAT NEWS