Rulls Bakeshop midaog na sab sa LLBA
CEBU, Philippines - Mihaon sa ilang ikalimang daog ang Rulls Bakeshop human nila gidusmog ang Roro Transport, 85-73 sa LLBA Rollway Customs Brokerage Cup 2011 basketball tournament didto sa Villas Magallanes gym sa Lapu-Lapu City.
Ang Rulls Bakeshop ni team owner Rupert Cañizar naglabaw og dos puntos sa first quarter, 18-16 ug wala na kini molingi pa sukad niadto.
Nanghasi sa maong duwa sila si Allan Sepe ug Erl Perez nga mibusdak og 21 ug 20 puntos matag usa alang sa Rulls Bakeshop nga nagbitbit na karon og 5-2 nga baraha.
Nakawang ang mga paningkamot ni Noli Paquibot, kinsa miratsada unta og 24 puntos, apan wala kini makapadaog sa Roro Transport ni team owner Roilan Sumilang.
Mihabwa og 24 puntos si Ruben Dignos alang sa Roro Transport nga nakatilaw sa ikalima nilang pilde sud sa pito ka duwa.
Sa pasiunang duwa, ang Igot Trucking ni team owner Junar Igot nakabawi gikan sa ilang makauuwaw nga kapildihan pinaagi sa pagdemolis sa Lheo Autoshop ni team owner Leo Almacin sa iskor nga 81-76.
Sa gihapon, si Jimboy Igot mao na sab ang topscorer sa miratsada nga Igot Trucking nga mikambiya og 21 puntos.
Ang pilderong Lheo Autoshop gipangulohan sab nilang Rene Cuadra ug Pangatungan nga adunay tag-18 puntos. (BANATSPORTS)
- Latest
- Trending
