MANILA, Philippines - Bukod sa mga aspirante para sa 2011 PBA Rookie Draft, aabangan rin ang ilang palitan ng mga players at pati na mga head coaches ngayong hapon sa Robinson’s Place sa Ermita, Manila.
Kabilang sa mga nasasangkot ay sina Alaska mentor Tim Cone at Dondon Hontiveros ng Barako Bull, ipinalit sa pangalan ng Air21.
Si Cone, nagbigay sa Aces ng Grandslam noong 1998, ay nililigawan ng isang koponan, samantalang pinupuntirya naman ng Petron Blaze si Hontiveros na hindi pa nabibigyan ng kontrata ng Barako Bull.
Ang Powerade ang maghihirang sa No. 1 overall pick sa first round kasunod ang Rain or Shine (No. 2), Barako Bull (No. 3), Powerade (No. 4), Shopinas (No. 5), Alaska (No. 6), Talk ‘N Text (No.7), Petron Blaze (No. 8), Barangay Ginebra (No. 9) at Barako Bull (No. 10).
Sa second round, ang Shopinas (No. 11) ang unang huhugot bago ang Talk ‘N Text (No. 12), Alaska (No. 13, 14 at 15), B-Meg (No. 16), Alaska (No. 17), Ginebra (No. 18), Barako (No. 19 at 20) at Talk ‘N Text (No. 21).
Tanging ang Meralco ang walang draft pick ngayong taon dahil naipamigay na nila ito sa kanilang mga nakaraang trades.
Sa kabuuang 34 aplikante, ang pangalan ni dating La Salle Green Archers at Smart Gilas Pilipinas shooting guard JV Casio ang matunog na kukunin ng Tigers bilang top overall pick, habang inaabangan naman ng Boosters, tinalo ang Tropang Texters sa nakaraang 2011 PBA Governors Cup, si dating University of the East Red Warrior gunner Paul Lee.
Maaari namang ipagpalit ng Clickers ni Franz Pumaren ang kanilang fifth overall pick upang makahugot ng player sa Llamados.
“Before the draft ilalabas na namin kung sino ang kukunin namin sa B-Meg,” wika ni Pumaren sa magiging hakbang ng Shopinas, ang ikalawang koponan ng Bert Lina Group of Companies bukod sa Barako.
Bukod kina Casio at Lee, ang iba pang inaasahang makukuha sa first round ay sina Smart Gilas players Marcio Lassiter, Chris Lutz, Mac Baracael, Mark Barroca, Jason Ballesteros at Dylan Ababou.
Nasa listahan rin sina PBA D-League MVP Allein Maliksi, Erik Salamat ng UAAP Grandslam champions Ateneo Blue Eagles, 6-foot-5 ½ Reil Cervantes ng Far Eastern University, 6’3 ¼ Ariel Mepana, 6’3 ¼ Ken Acibar at 6’7 Magi Sison ng University of the Philippines.
Posible ring umagaw ng eksena si Fil-Am guard Julius Pasculado, naglaro sa Wilbur Wright College.