CEBU, Philippines - Nakasakay si kanhi world champion Paulie Malignaggi nganong naglikay si Floyd Mayweather Jr. sa pakigsangka ni world pound-for-pound king Manny Pacquiao.
Matud pa ni Malignaggi, nga adunay rason nga motalaw si Mayweather tungod kay nasayod siya nga anaa ni Pacquiao ang tanang hinagiban nga maoy bugtong makapilde kaniya.
Basi sa nangaging mga away niini, si Mayweather naglisod atol sa pakig-away niini ni Zab Judah ug Oscar Dela Hoya nga pulos sab kugihan manumbag.
Tungod niini, nagduda si Malignaggi nga kahibalo gyud si Mayweather nga dili siya mosalir ni Pacquiao, kinsa nakabaton og talagsaong abalidad.
Nasayran nga nabuhian pagbalik sa paglaum ang mga boxing fans kabahin sa dugay nang gipaabot nga superfight human miuyon si Pacquiao sa unlimited blood testing nga gidemanda ni Mayweather,
Apan hangtod karon, wala pa mihatag sa iyang habig ang undefeated welterweight nga si Mayweather kun mouyon na ba siya sa away karon nga wala na kini babag. (BANAT SPORTS)