CEBU, Philippines - Gipatas-an ang rota sa 16th Don Sergio Osmeña Sr. Memorial Run, ang labing karaang lumba sa siyudad Sugbu nga gikatakda karong Septiyembre 9 diha sa Plaza Independencia.
Gikan sa naandang 10K race, gipalay-an kini ngadto sa 15K, samtang ang 5K gihimong 7.5K aron mapun-an ang hagit sa liboan ka mga runners nga gilaumang managan.
Ang lumba gihalad sa ika-133 nga sumad sa adlaw'ng natawhan sa "Great Grand Old Man" sa Sugbu nga si Osmeña.
Atol sa press conference kagahapon didto sa The Port restaurant, si Cebu City Sports Commission (CCSC) chairman Edward Hayco mipahibalo nga sirad-an ang mga dagkung dalan atol sa lumba alang sa seguridad sa mga runners.
Mokabat ngadto sa P200,000 nga ganting salapi ang giandam alang sa top 10 finishers sa matag kategoriya.
Nakanindot sa maong lumba mao ang barato nga registration fee nga P150 libre na ang singlet, snacks ug gift packs gikan sa International Pharmaceutical Incorporated (IPI).
Mahimong magpalista sa CCSC office sa Cebu City Sports Center. (BANAT SPORTS)