UV Lancers, 3-0 na

CEBU, Philippines - Nagsandig sa kombinasyon nilang John Michael Abad ug Edrian Lao ang University of the Visayas (UV) Green Lancers, kinsa mitumba sa University of San Carlos (USC) Warriors, 80-60 ug sakmiton ang solong liderato uban ang limpiyong 3-0 nga baraha sa 11th Cebu Schools Athletic Foundation Inc. (CESAFI) basketball event sa miaging gabii diha sa Cebu Coliseum.

Ang UV Lancers tinguhang moposte og upat ka daog sa dihang ilang sangkaon ang Southwestern University (SWU) Cobras karong gabii. 

Naglisod ang Lancers diin gibiyaan kini'g siyete puntos sa iskor nga 36-43, apan ilang gibawi ang bugnaw nilang performance sa first half ug nagpatuyang kini pamuntos sa third period.

Human nila makuha ang 61-53 nga labaw sa buzzer-beating ni Harold Cincoflores, ang Lancers nagsugod na og panghasi sa ilawom sa pagpangulo nilang Lao ug Abad nga nakapakaging sa Warriors.

Si Abad maoy topscorer sa Lancers uban ang 27 puntos, samtang si Lao miabuno og 21 puntos, gisundan ni Jerome Silva nga adunay 11 puntos.

Samtang ang pilderong Warriors gipangulohan ni Giovanni Padillo, kinsa miburak og 18 puntos, samtang si Michael Cantonao midugang og 11 puntos.   (BANAT SPORTS)