CEBU, Philippines - Bag-o lang nakalingkawas sa kulbahinam nga kadaugan batok sa paboritong Southwestern University (SWU) Cobras, ang University of San Carlos (USC) Warriors nagpauwan og mga puntos aron lumsan ang Cebu Institute of Technology-University (CIT-U) Wildcats, 86-66 sa nagpadayong 11th Cebu Schools Athletic Foundation, Inc. (CESAFI) basketball event niadtong Domingo diha sa Cebu Coliseum.
Sa sayo pa, ang University of Southern Philippines Foundation (USPF) Panthers mihimo og impresibong 73-63 nga kadaugan batok sa University of San Jose-Recoletos (USJ-R) Jaguars sa ilang debut aron hatagan ang naulahi sa ilang ikatulong sunod-sunod nga kapildihan.
Sa mga duwa sa secondary, ang University of the Visayas (UV) Baby Lancers yano kaayong mi-ihaw sa USP-F Baby Panthers, 95-53 alang sa ilang ikaduhang daog, samtang ang USJR Baby Jaguars naka-eskapo bitbit ang 77-75 nga kadaugan batok sa University of Cebu (UC) Junior Webmasters.
Ang Warriors, kinsa naka-upset sa Cobras niadtong Sabado, 65-53, nagsolo karon sa ikaduhang dapit uban ang 2-1 nga baraha. Pareho sab mihimo’g two-game streak sa kasamtangan ang co-leaders UV ug UC kinsa parehong naghupot og 2-0 nga baraha.
Yano kaayong namupo og mga puntos ang Warriors nga nakapapungot ni Floyd Taboada sa Wildcats nga kansang pisikal nga duwa wala makatabang pagpadaog sa iyang koponan.
Ang iyang pisikal nga duwa miresulta ngadto sa iyang "ejection" sa katapusang 2:47 sa duwa dihang gitawgan sa iyang ikaduhang technical.
Si Taboada, kinsa mag-atubang og one-game suspension mi-iskor lang og singko puntos.
Gawas lang nilang Mel Steven Duran ug Nicolas Kyle Magat, ang tanang 13 ka players sa Warriors pulos naka-iskor nga pinangulohan ni Miko Santos sa iyang 12 puntos.
Si Allan Dimco maoy nangulo sa Wildcats nga miposa og 25 puntos, samtang si Franklyn Batiquin midugang og 17 puntos.
Sa laing bahin, sila si Fritz Dajalos ug Anthony Linao mihipos og 15 ug 13 puntos matag usa aron pangulohan ang Panthers. (BANATSPORTS)