SWU Cobras sugod na kampanya sa CESAFI

CEBU, Philippines - Sugdan karon sa title contender Southwestern University (SWU) Cobras ang ilang kampanya dihang ilang ikabagat ang University of San Carlos (USC) Warriors karong gabii sa main game sa pagpadayon sa 11th season sa Cebu Schools Athletic Foundation, Inc. (CESAFI) diha sa Cebu Coliseum.

Tinguha sab sa University of the Visayas (UV) Green Lancers nga mokulit sa ilang ikaduhang daog aron mosaka ngadto sa unang puwesto batok sa Cebu Institute of Technology-University (CIT-U) Wildcats sa alas-4 sa hapon.

Nahimong sumsoman sa tabi-tabi ang Cobras isip maoy labing lig-on nga team sa pre-season ug buot nila kining pamatud-an karong gabhiona. Dili lang kay ilang gipalig-on ang ilang team, apan ilang giusab ang hulagway sa team pinaagi sa pagkuha sa beterano ug multi-titled coach nga si Raul 'Yayoy' Alcoseba.

Si Alcoseba katapusang nidala og team sa collegiate niadto pang 1999 dihang iyang gitimonan ang Cebu Doctors' University (CDU) Stallions ngadto sa kampiyonato human nilang gipukan ang Cobras nga niadtong higayona ubos pa ni coach Eddie Ybañez duha ka tuig sa wala pa ilisi ang Cebu Amateur Athletics Association (CAAA) ngadto sa giila karong CESAFI.

Pagka sunod tuig, gibawi sa Cobras ang korona gikan sa Stallions, apan ubos na ni coach Dodie Miego.

Sa laing bahin, ang UV Lancers gisugat og daog sa una nilang duwa batok sa University of San Jose-Recoletos (USJ-R) pinaagi sa pagpangulo ni Edrian Lao, kinsa mibulit og 24 puntos.

Sila si Medjet dela Rama ug Banjo Capillar mao sab ang nangu sa Jaguars nga adunay 13 puntos matag usa. (BANATSPORTS)