CEBU, Philippines - Nakarekober ang Rulls Bakeshop human masugamak sa una nilang duwa dihang ilang gipakaging ang Sutike Yama, 87-79 sa LLBA Rollway Customs Brokerage Cup 2011 basketball tournament didto sa Villas Magallanes gym, Lapu-Lapu City.
Ang Rulls Bakeshop nidominar sa kinatibuk-ang duwa nga walay kisaw diin miposte kini og double figures nga labaw ug wala na molingi pa sukad niadto bisan pa sa pagpanghulga sa Sutike Yama.
Bugtong nahimo sa Sutike Yama ni team owner Rolly dela Pieza mao ang pagkitkit sa labaw ngadto sa single digit, kay ang Rulls Bakeshop ni team owner Rupert Cañizar puwerte man sab ka-agresibo sa ilang duwa nga nagtukmod kanila ngadto sa ganghaan sa kadaugan.
Unom ka players ang gipangulohan ni Sammy Lapoja pinaagi sa iyang 18 puntos ang mirehistro og double figures. Si Noli Paquibot mikulit og 16 puntos, gisundan ni Allan Sepe nga misansan og 13 puntos. Si Gallarte mibahog og 11 puntos, samtang sila si Alian ug Perez parehong mitimbre og 10 puntos.
Ang Sutike Yama gipangulohan ni Amay Palad, kinsa mikamada og 17 puntos.
Ang torneyo gipaluyohan sab ni Rolly dela Pieza, Dr. Michael Ouano ug sa JB Sportswear ni Billy Nadado.
PUNTOS MATAG USA
Unang duwa:
RULLS BAKESHOP (87) - Lapoja 18, Paquibot 16, Sepe 13, Gallarte 11, Alian 10, Perez 10, Llenes 6, Dacoco 2, Pedrano 2
SUTIKE YAMA (79) - Palad 17, Dejecto 15, Brañanola 13, Rukawa 12, Felix 11, Adlit 11, Temporada 6, Danalaon 1 (BANAT)