UC Webmasters masaligon makasud sa finals

CEBU, Philippines - Masaligon ang University of Cebu (UC) Webmasters nga makasud sa finals sa 11th Cebu Schools Athletic Foundation Inc. (CESAFI) bisan pa sa presensiya ni Raul 'Yayoy' Alcoseba isip coach sa Southwestern University (SWU) Cobras.

Ang 11th CESAFI basketball event sugdan ugma diha sa Cebu Coliseum.

Nagkanayon si UC Webmasters coach Roel Gomez nga naglaum sila nga ilang mamentinar ang ilang winning performance sa elimination round aron seguradong makakuha og luna sa finals.

"I believe and pretty much confident that with the balanced roster of players that we have for this season, we can make it to the finals and if that will happen, we have a greater chance of claiming the championship again," matud pa ni Gomez atol sa press conference kagahapon didto sa Café Laguna sa Ayala Terraces.

Laing makapadasig sa Webmasters mao ang ilang pag-apil isip representante sa Pilipinas alang sa 26th Universiade Games 2011 didto sa Shenzhen, Guangdong, China karong Agosto 12-23.

Sa laing bahin, si Alcoseba mobalik sa collegiate basketball isip chief tactician sa Cobras.

Si Alcoseba nahimong league coaching sa Cebu Doctors' University (CDU) Stallions ug sa University of San Jose-Recoletos (USJ-R) Jaguars panahon pa sa Cebu Amateur Athletics Association (CAAA) ug una kini niya sa CESAFI.

Sa iyang pagbalik, ang Cobras usa na sa mga koponan nga lisud buntogon karon nga season.

Karong tuiga, usahon ang tanang sporting events sa CESAFI opening. Lahi sa nangaging mga katuigan, ang basketball ug ubang sporting events opening gibuwag.

Gawas sa basketball, ang laing sporting events nga tigian mao ang badminton, chess, dancesport, football, lawn tennis, table tennis, karatedo, sepak takraw, volleyball, beach volley ug swimming. (BANATSPORTS)