MANILA, Philippines - Pantayan uli ang karta ng pahingang San Beda ang pupuntiryahin ng San Sebastian sa pagbabalik aksyon ng 87th NCAA men’s basketball ngayon sa The Arena sa San Juan City.
Tiyak na masisilayan uli ang bangis ng tatlong kamador ng Stags na sina Calvin Abueva, Ian Sangalang at Ronald Pascual sa pagharap nila laban sa Emilio Aguinaldo College sa alas-2 ng hapon.
Mag-uunahan naman ang Jose Rizal University at St. Benilde sa paghahangad ng ikatlong tagumpay sa liga sa kanilang pagtutuos dakong alas-4 ng hapon.
Si Abueva ang number one sa liga sa scoring sa 23 puntos, rebounding sa 12 boards at steals sa 5 kada laro habang 18 puntos at 2.2 assists naman si Pascua.
May dalawang sunod na talo naman ang Generals na haharap sa larong ito at kailangan nilang itaas ang antas ng paglalaro laban sa Stags dahil na rin sa katotohanang sila ay yumukod sa Mapua at San Beda taglay ang 29 puntos losing margin.