CEBU, Philippines - Mipatigbabaw ang mga Sugbuanong cyclists sa 4th Kia Ironlegs cycling race niadtong weekend didto sa Panglao Island sa Tagbilaran City.
Ang Cebuano cyclists nangharos sa category A ug B sa individual time trial sa usa sa labing dakung cycling race didto sa Bohol.
Ang Hong Kong-based Cebuano architect nga si Francis Lim maoy kampiyon sa category B sa oras nga 20:26.97, gisundan ni Michael Flores sa oras nga 20:41.54.
Mipahiluna sa ikatulo ang Bol-anong si Robert Saniel (20:46.17), samtang laing duha ka Sugbuanon nga sila si Romel Limpangog (20:58.30) ug Tyre Lambo maoy mikompleto sa top five placers.
Sa category C, naghari si Jonathan Simbajon sa oras nga 20:08.00, gisundan sa The Freeman columnist nga si JV Araneta sa oras nga 20:50.00 ug Paul John So (20:54.25) alang sa ikaduha ug ikatulo nga dapit.
Ang taga-Manila nga si Emmanuel Tiples (20:57.17) ug Australian nga si Brett Harrington (21:08.54) mi-okupar sa ikaupat ug ikalimang dapit.
Ang Sugbuanong teen cycling sensation nga si Luis Miguel 'Igimax' Maximo mikapyot sa ikaunom sa oras nga 21:41.24. - (THE FREEMAN)