Peñalosa mobida sa Laban ng Lahi

CEBU, Philippines - Usa ka rising star ug duha ka Filipino world title contenders ang mobida sa laing eksplosibong boxing event sa GerryPens Promotion ug GMA-7 nga ulohan og "Laban ng Lahi, Dugong Kampeon" karong Agosto 6 didto sa Mandaue City Cultural and Sports Complex.

Ang undefeated super bantamweight prospect nga si Dodie Boy Peñalosa, Jr. mao ang moaway sa main event uban ni   kanhi WBC light flyweight champion Rodel 'Batang Mandaue' Mayol ug two-time OPBF champion Jimrex 'Executioner' Jaca.

Lab-as pa sa iyang impresibong fourth round knockout victory batok ni Jeffrey Jimenez, ang 20-anyos nga anak ni former two-division world champion Dodie Boy Sr. ug pag-umangkon ni ring icon Gerry Peñalosa mopakita na sab sa iyang katakus ug ning higayona batok ni Kong Kiatprachagym sa Thailand.

 "Challenge ni sa akoa kay next level na gyud ni kay first foreigner nako ni siya nga kontra. Pero ako confident ko and ensayohan gyud nako ni og tarong aron modaog ko," matud pa ni Dodie Boy Jr. atol sa press conference kagahapon didto sa Sports Exchange Bar and Grill.

Sa iyang bahin, si Mayol mipadayag sa iyang kahinam nga moaway atubangan sa iyang mga katagilungsod sa labing unang higayon.

Ang Los Angeles-based Cebuano fighter nga si Mayol gipaabot nga moaway alang sa world title batok ni Hernan 'Tyson' Marquez sa Mexico.

 "Five years na sukad nga niaway ko dinhi sa Cebu ug lipay kaayo ko nga makapakita ko og aksiyon atubangan sa atong mga kaigsuonan," matud pa ni Mayol. "Si Marquez gyud akong gusto kontrahon ug aron makabawos pud ko sa iyang gibuhat ni (Edrin) Dapudong."

Si Mayol makigsangka ni Jayson Rotoni sa Manila, samtang si Jaca makigsinukliay og kumo ni Philip Jun Demecillo sa Davao City. (BANAT NEWS)