CEBU, Philippines - Wala igsapayan ni Irwin Uypitching ang makutas niyang biyahe kay ang iyang kalapoy gisuklian man og dakung kadaugan dihang gisakmit niya ang korona sa expert division sa second leg sa 1st Keiz BJ Motors Motocross Series nga giuloha'g "Double Birthday Celebration Motocross Competition" niadtong Domingo didto sa Caduawan race track sa lungsod sa Tabogon, Cebu.
Gilupig ni Uypitching sa Dumaguete City ang laing banggiitang riders nga sila si Jovie Saulog ug John Flores nga mi-okupar sa sunod nga duha ka puwesto.
Nakabawi hinuon si Flores dihang iyang gidominar ang "habal-habal" division batok nilang Jovie Basco, Kent Limpag, Mark Lee Frasco ug Velasco Karrem nga maoy mikompleto sa top five.
Usa sa gipahinungdan ning maong lumba nga si Keizer Ornopia, kinsa nagselebrar sa iyang adlaw'ng natawhan niadtong Hulyo 13, nakadawat og ulahi niyang birthday gift human niya gidominar ang mini 65cc. class. Ang iyang maguwang ug opening leg winner nga si Ken Ornopia nalandig sa ikaduha, samtang si Kyle Gastador napunta sa ikatulo.
Bisan nalagpot sa ikaduha, si Kenken angay sab gihapon nga magmaya tungod sa iyang paghari sa peewee division. Gisundan siya nilang Kyle Gastador ug Harry Lauron alang sa ikaduha ug ikatulo nga dapit. Mikompleto sa top five mao sila si Zeb Cuyos ug JR Comendador.
Ang top three sa mini 85cc. mao sila si Denmark Supatan, JP Cuesta ug Brylle Ornopia.
Si Ray Quirol mao gihapon ang nanghawod sa local enduro, samtang sila si James Mayol ug Dongdong Batiquin miangkon sa ikaduha ug ikatulo nga dapit.
Gilangkat ni Russel Gungob ang kampiyonato sa beginners open batok nilang Banjo Monilar ug Quirol nga mi-okupar sa mosunod nga duha ka dapit.
Si RK Cuesta mao gihapon ang labing kusog sa ladies category, gisundan nilang Janelle Saulog ug Lyka Cuyos.
Lain pang niangkon og kampiyonato mao sila si Quirol sa beginners open, Cyril Tariman sa intermediate, samtang si Renante Tigue mipatigbabaw sa wanggits.
Nidaog sab og korona si Russell Gungob sa executive A, samtang sila si Titing Sicad ug Danilo Gastador mao sab ang naghari sa executive B ug C.
Gipasiugdahan ni Keiz BJ Motors big boss Siegfred Ornopia, ang usa ka adlaw nga lumba gipaluyohan sab sa Haojue Phils. pinaagi sa ilang managing head Edmund Pingkian, Cebu Mufflerhaus, RMO Motorparts, NC Racing, Joy Flores, Dr. Philip Montejo, GR Cycle Parts, Bogo Cycle Center, JRC Marketing ug Motormade Merchandising. - BANAT NEWS