Super Fight Hanap

MANILA, Philippines - Bisan pa sa pagtando sa kampo ni Manny Pacquiao nga mopailawum sa random blood testing, dili gihapon kini garantiya nga mahitabo na ang gipaabot sa kadaghanan nga Pacquiao-Floyd Mayweather showdown.

Kini matud pa sa boxing columnist nga si Darren Barcomb sa 8countnews.com, kinsa nagtuo nga laing suliran ang mogimaw nga mahimong babag sa atol sa negosasyon sa maong super fight.

Nasayran nga niadtong Sabado, gibutyag ni Top Rank Inc. CEO Bob Arum nga uyon na si Pacquiao sa dugay nang gipamugos ni Mayweather nga random blood test, apan sa kondisyon nga dili ang USADA ang mohimo sa maong test.

Rasun ni Arum mao nga iyang pagduda sa kridibilidad sa USADA nga gihulagway niya nga bias ngadto sa Amerikanong boksidor.

Tungod niini, nakita ni Barcomb nga ang isyu na usab sa kung kinsa ang mopahigayun og blood testing mao ang mohaling og laing init nga lalis tali sa duha ka kampo.

“It is uncertain if Mayweather will agree to this stipulation. Mayweather wants the USADA to perform the test because he believes they are credible and he apparently is weary of tampering,” matud pa ni Barcomb.

Dugang pa ni Barcomb nga nakapalisud sa negosasyon sa maong super fight mao ang politika sa boksing.

Si Mayweather makigharung ni Victor Ortiz sa Septiyembre didto sa Las Vegas , apan inay si Pacquiao, mas gitan-aw karon sa kampo niini ang usa ka sangka batok sa Briton nga si Amir Khan.  - BANAT NEWS