Fighters andam na sa YFC 5 karong Agosto 6

CEBU, Philippines - Iyahay na og pakondisyon ang mga fighters gikan sa nagkadaiyang martial arts stable sa Kabisay-an alang sa Yaw-Yan Ardigma Fighting Challenge (YFC 5): Recompense karong Agosto 6 diha sa Cebu Coliseum.

Gawas nga usa kini ka qualifying event alang sa Ground and Pound VI series, gipahibalo usab ni Yaw-Yan ArDigma-Cebu founder Benigno 'Ekin' Caniga Jr., ang Universal Reality Combat Championship (URCC) mangita sab og mga potensiyal nga fighters.

"Motan-aw sila sa away and mag-scout sila for potential fighters para sa URCC," matud pa ni Caniga Jr.

Mga fight clubs nga mosalmot mao ang Yaw-Yan ArDigma, Projectile Fit, Calma Stable, Rednios Gladiator MMA sa Talisay, Soma Kickboxing, Arcom Jukai KBC, JR Grand MMA ug Unified MMA sa Mandaue, Yaw-Yan Musang, Durex KBC sa Lapu-Lapu.

Mosalmot usab ang Muay Thai Association of the Philippines sa Dumaguete, Red Dragon MMA sa Tagbilaran ug Mindanao Unified Martial Arts sa Cagayan de Oro City

Moaway sa main event mao ang garbo sa Yaw-Yan ArDigma nga si Kyle 'Hurricane' Co batok ni Mark 'Terminator' Araneta sa Team Unified MMA.

Sa supporting bout mao sila si Renan 'Limbas' Noblefranca ug Danilo 'Alasan' Tudtud sa Yaw-Yan ArDigma batok nila ni Steve 'D Lightning' Sevilleno sa Cagayan de Oro ug Jijito 'Excalibur' Imbo sa Team Durex KBC. (BANATSPORTS)