Organizers sa Dubai idedemanda ng PBA

MANILA, Philippines - Sinabi kahapon ni PBA Commissioner Chito Salud na iniisip niyang gumawa ng legal action laban sa nag-organisa ng dalawang laro ng 2011 PBA Governors Cup sa Dubai, United Arab Emirates noong nakaraang linggo.

Bunga ng kapalpakan, kinailangan pang mag-isyu ng PBA ng isang promissory note sa halagang P1.3 milyon para matiyak ang paglabas ng Dubai ng 80 individuals mula sa kani­lang two-game series na inilaro sa sell-out crowd na Al Shabab Sports Club.

Ang bawat Filipino overseas workers sa Dubai ay nagbayad ng P1,800 o P800 para sa tiket sa natu­rang 4,000-seat stadium noong nakaraang Huwebes at Biyernes.

Ngunit noong Biyernes, ipinaalam kay Salud ng Da­na Express Travel na kung hindi babayaran ni local promoter Ramon Pizzaras ang obligasyon nitong P2.6 milyon ay kakanselahin ang mga flight tickets ng Talk ‘N’ Text, B-Meg at Barangay Ginebra pabalik ng Maynila.

 “It was unfortunate that this was how our visit ended, particularly as we played two very well-received games before our countrymen in Dubai,” sabi ni Salud.  

Bago ito, binalaan na ni Talk ‘N Text coach Chot Reyes ang PBA kaugnay sa mga nakaraang kapalpakan ni Pizzaras.