Taga-Opon gisaara'g House and Lot ni Pacquiao

CEBU, Philippines - Tungod sa init nga pagdawat kaniya sa mga Oponganon, misaad si Pinoy boxing superstar ug Sarangani Province representative Manny Pacquiao nga moapud-apod og mga pahalipay lakip niini ang house and lot sa mga residente sa Lapu-lapu.

Kini maoy gipadayag ni Pacquiao atol sa iyang free concert niadtong miaging gabii atol sa pagbukas sa Hoopsdome didto sa Brgy. Gun-ob sa Lapu-lapu City.

Si Pacquiao nagkanayon nga mahitabo ang pagpanghatag niya og mga katigayunan atol sa iyang nagsingabot nga game show sa GMA-7 nga giulohan og “Manny Many prizes.”

“Gusto nyo, dalhin ko ang show ko dito para dito ako mamimigay? Sige, bigyan ko kayo ng house and lot at iba pa.Pag-uusapan namin ito ni Mayor Paz at ni Congressman Arthuro Radaza yan” sangyaw pa ni Pacquaio sa kapin 6,000 ka mga mitan-aw sa iyang concert didto sa Hoopsdome.

Ang pagbisita ni Pacquiao dinhi sa Sugbu usa lang sa mga pipila niya ka mga aktibidadis sa dili pa sugdan ang iyang promotional tour ug ensayo alang sa away nila ni Juan Manuel Marquez sa Nobiyembre 12 didto sa Las Vegas. – LPM (BANAT NEWS)