MisOr mo-host sa SMC Liga Pilipinas

CEBU, Philippines - Magkuros na usab ang dalan sa three-time leg titlist Mandaue RDAK Transport Cebu Landmasters ug defending Liga Pilipinas champion M. Lhuillier Kwarta Padala Cebu Niños sa MisOr leg sa SMC Liga Pilipinas Conference V nga sugdan karong adlawa didto sa Xavier University Gym.

Bag-o pa midaog sa ilang ikatulong leg titles, ang Landmasters ni team owners Joe Soberano ug Rick King gituohang mopasada na usab sa tuyo nga masakmit nila ang ikaupat nga leg title.

Ang Landmasters ni coach Jun Tan magsalig gihapon ni two-time leg MVP Mark Magsumbol, Ariel Capus, Axel Doruelo, Hafer Mondragon, Harold Sta. Cruz ug Marlon Basco.

Lahi sa Landmasters, ang Cebu Niños nga igo lang midaog og usa sud sa katapusan nilang unom ka duwa mosuway pagbangon aron makuha ang kampiyonato sa MisOr leg nga mopalig-on sa ilang kahigayonan alang sa Super Leg.

Nadugangan usab ang hinagiban sa opensa sa Niños ni team owner Michel J. Lhuillier ug coach Raul 'Yayoy' Alcoseba sa pagsulod nila ni Ogie Menor, Allein Maliksi, Marvin Hayes, Mark Jefferies, Argel Mendoza ug Ariel Mepaña

Hinuon, gawas sa Mandaue ug Cebu, maningkamot usab sa pagsakmit sa kampiyonato sa final leg sa elimination   ang host MisOr Meteors nga milig-on tungod sa pagbalik ni Ardy Larong, Mark Moreno ug JR Gerilla ug ang General Santos MP Warriors.   (BANAT SPORTS)